Vos invitamus ad scholas vel praelectiones Pauli illius Pezzuolo, magistri principis SCHOLAE HUMANISTICAE, instituti sc. Pataviensis, quod linguis litterisque antiquis resuscitandis dicatum’st.
Cum in scholis propositis praesertim dramata tractanda sint, dici oportet Paulum Pezzuolo praeter litteras magnam operam collocare etiam in arte ludicra rebusque theatralibus, sc. non modo investigasse theatri antiqui mores et relicta, sed etiam fabulas scripsisse et egisse; anno MMXXI primum in scaenam produxisse Antenorem, fabulam ab ipso Venetice conscriptam, eamque ex eo tempore per oppida Venetorum agi; anno MMXXII docuisse et egisse Bacchum Pentheum, fabulam sumptam ex Bacchis Euripidis et iambis Latinis ab eo ipso redditam; eodem anno instituisse THALIAM, primos ludos theatrales Latinos omnium gentium, qui celebrati sint Vicetiae anno MMXXII.
Ordo scholarum:
- Nov. 19, die Saturni, h. 13, K2 aud. – Ecerinis I
- Nov. 21, die Lunae, h. 9 / h. 11, K2 aud. – Latinitas Latine a primo gradu
- Nov. 22, die Martis, h. 13, K2 aud. – Ἡ τραγικὴ τέχνη· τοῦ Ἐυριπίδου Βάκχαι
- Nov. 23, die Mercurii, h. 9, 127 aud. – Ἡ τραγικὴ τέχνη· τοῦ Ἐυριπίδου Βάκχαι
- Nov. 24, die Iovis, h. 11, 123 aud. – Ἡ κωμικὴ τέχνη· τοῦ Ἀριστοφάνους Νεφέλαι
- Nov. 25, die Veneris h. 13, K2 aud. – Ἡ κωμικὴ τέχνη· τοῦ Ἀριστοφάνους Νεφέλαι
- Nov. 26, die Saturni, h. 13, K2 aud. – Ecerinis II
Ecerinis est prima tragoedia scripta post occasum Urbis, in qua narrantur cruenta et atrocia facta Ecelini Romanensis (Ezzelino III da Romano), qui dicebatur esse filius Satanae: is enim saeculo XIII coeperat terminos sui imperii movere, plures civitates Venetiae internae asseruerat, ut Patavium, Vicetiam, Bassianum, Veronam, Tarvisium. Res cito ad tyrannidem, sicas, carceres, strages spectare coepit. Scriptor istius tragoediae, Albertinus Mussatus Patavinus, enarrat vitam Ecelini ab initio dominationis usque ad eum interfectum.
Mussatus enim natus erat tyrannide Ecelini (sive Ecerini) iam dissoluta, sed omnia quae tunc accidissent audiverat ex patre et senibus quae eis rebus interfuerant. In historiis litterariis haec vel sola ex tragoediis Latinis recentioribus dicitur scripta esse de rebus proxime gestis, non antiquis.
Venite exspectati!